Member-only story
故事創作
0.下文為粵語。對於一個肥妹嚟講，限聚令之下唔準堂食可能係一件好事。肥妹心諗，終於唔駛受到引誘，疫情下間間餐廳都有推出優惠，成日覺得唔食好似好唔抵，食完又覺得對自己唔住，唉，又吸收咗過千卡路里，跑步多一圈都減唔返。
肥妹呢排運動係戴口罩行路返公司，一戴咗口罩成身出曬汗，加速新陳代謝，越唞唔到氣越好，可以刺激身體燃燒多啲脂肪。漸漸，肥妹離不開口罩，戴咗口罩直頭連運動都唔駛做（因為gym room都封鎖，想做都無得做），依家口罩係佢最親密嘅服飾。
佢戴咗口罩瞓咗一個星期，身體開始有變化，輕咗1Kg咁多！由個一刻開始，佢就知道，可能係命中注定要佢面對呢一場世紀大疫症，係個天幫佢減肥，係吸引力法則，佢一直諗要唔辛苦減肥（作自稱為：無痛減肥），終於自已可以不費吹灰之力塑造美好身段。
日日夜夜戴口罩，焗到自已時不時暈暈地，有時好似仲會出現幻覺。不過唔驚！呢個感覺好好，身體冇力，如果你堅持落去頂住，身體就會自動提取存備用嘅脂肪，所以肥妹仔好享受呢種手軟腳軟嘅感覺，證明佢瘦緊。
成日出汗好快會用曬啲口罩，肥妹頭腦轉一轉，佢諗到另一種減肥方法去代替行路出汗，就係唔食嘢！唔食嘢又可以唔駛除低個口罩，又可以慳返一個口罩。
慢慢，佢一日廿四小時連瞓覺都係戴住口罩，特別有安全感。有一朝起身，佢摸到自己塊臉有少少腫咗，明明平時都好少飲水了，竟然仲會水腫。佢入去廁所望塊鏡，個口罩融入咗塊臉度……
口罩布料同臉上面嘅皮膚撈埋咗一齊，佢想扯開都扯唔到，想開口都開唔到，其實唔係好明顯，因為口罩係一層薄薄貼住係臉上。肥妹第一下想法係，咁咪好囉，唔駛將啲口罩換嚟換去，直至佢發現自己開唔到口，擦唔到牙。
佢狠心咁攞鉸剪，勉強扯開個口，慢慢剪開，竟然係唔痛，可能係一件好事，反正都禁堂食，咁咪唔駛食嘢囉，又可以叫自己忍下口。根據吸引力法則嘅道理，係天聽到自己嘅願望，所以決定幫佢減肥所以先會發生依件奇異嘅事，一諗到係個天照顧自己就覺得好安全。
就係咁肥妹仔第一次唔駛自己戴口罩出街，但又有口罩係塊臉度。個日返工，好死唔死要出去見客，老細都特登行埋佢個位度：「一陣見客化返個妝喇。」老細臨走前放低支男性用的G字頭止汗劑畀佢。
自從戴口罩之後，肥妹都無再化妝，係好事，當畀皮膚休息下。老細叫佢化妝，即係一陣要除口罩（到底係咩會要人除口罩？），但佢己經除唔到口罩，想同老細解釋都開唔到口講。
就快到中午，佢行入廁所望住鏡入面嘅自己，問緊自已點算。
「都無得點算，照做囉。」佢心裡面諗。佢諗起呢半年嚟，佢都唔係好知道自己要做咩，原本諗住去Working Holiday 找尋人生意義，結果出唔到香港，一困住喺香港真係唔自己想點，唯有人哋話點行就點行，人哋話點做就點做。
於是，佢攞起個粉盒，將近似自己膚色嘅粉底抺係口罩上面，之後再戴多個口罩。
希望個客唔會發現啦。
（寫在歷史性禁堂食的30分鐘前。）
